Rechercher dans ce blog

jeudi 24 avril 2008

الفول بالكروفيت


السلام عليكم و رحمة الله





حبيباتي ان شاء الله تعجبكم هاد الوصفة




معروف ان الفول من الخضر ديال فصل الربيع

كلنا كنعرفو نديرو الفول فالطاجين او بيصارة او مشرمل او فالكسكس
و باش ننوعو شوية فطريقة تقديمو
كل مرة غنحط ليكم طبق و فكرة جديدة لتقديم الفول
و ان شاء الله تنال اعجابكم







اليوم طبقي و فكرتي هو الفول بالكروفيت
جا بنين و ساهل فالتحضير




نخليكم مع المقادير و الطريقة


















المقادير :




فول
كروفيت
قزبر ومعدنوس
بصلة بيضاء
ضرس ثوم
ملعقة كبيرة زبدة
ملح
راس ملعقة صغيرة ابزار
ملعقة صغيرة كامون



راس ملعقة صغيرة كاري
















الطريقة:

اولا بعد منقينا الفول



كنرقدوه فالماء واحد ربع ساعة و نغسلوه مزيان



و كنديرو الماء يغلى مزيان







وكنلوحو فيه الفول يتسلق



مدة 10 دقائق لا اكثر



و كنصفيو الفول من الماء السخون



و كنكبوه فإناء فيه ماء بــــارد الى مثلج
باش نوقفو عملية الطياب و باش يبقى الفول محافظ على لونو الاخضر


بعدها كنبداو نزولو للفولة القشرة الرقيقة للي مغطياها
بالطريقة المبينة فالصور



اي اننا كنحيدو اعلى الفولة



و كنخرجوها من الغلاف ديالها بالضغط عليها من الاسفل



و ها هو الفول ديالنا واجد





و كنبداو فتحضير الطبق النهائي



فطنجرة كنعمل الزبدة



مع البصلة مشلضة رقيقة



و العطرية : الملح + راس ملعقة صغيرة ابزار
+ ملعقة صغيرة كامون + راس ملعقة صغيرة كاري




و كنضيف عليها الماء للي طلق الكروفيت مللي ديكونجلا
و نخلي الكل يتشحر




ملي كتذبال البصلة و كتتشرب التوابل كنضيف الكروفيت
و كنحرك مزيان




ثم نضيف الفول



و نضيف القزبر و المعدنوس مشلضين
و ضرس الثوم المحكوك



و نحرك الكل فوق عافية مهيلة واحد 2 دقائق
حتى يتشربو كل المكونات المرق و بنة التوابل



و نطفي عليه
و هاهو واجد















التقديم :





كنقدموه كطبق رئيسي مع الخبز مڭرمل او عادي




او كمقبلات




و بالصحة و الراحة










انا شاء الله تعجبكم الوصفة و تكون اضافة جديدة و مفيدة ليكم


و كيف واعدتكم غنحط ليكم باقي اطباقي و وصفاتي المحضرة بالفول



اللهم لك الحمد و الشكر كما ينبغي لجلالك على نعمل الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته

samedi 5 avril 2008

سلطة البطاطة مشرملة مع السبانخ





السلام عليكم ورحمة الله وبركاتة





وصفتي لليوم خفيفة ضريفة ان شاء الله










سلطة البطاطة مشرملة مع السبانخ




المقادير :





بطاطة
سبانخ
ملح
ثوم
كمون
زبدة
قزبر و معدنوس مشلضين






الطريقة :

اولا كناخذو اوراق السبانخ و نرقدوها فماء فيه خل للتخلص من الشوائب







و فنفس الوقت كنسلقو او نبخرو البطاطة
انا هنا بخرتها باش تحافظ على اكبر قدر من مكوناتها و فنفس الوقت متتفرتتش فالماء

بعد مكطيب البطاطة كنقطعها و كنقطر اوراق السبانخ من الماء



في مقلاة كنعمل الزبدة ( نصف ملعة كبيرة القياس حسب الرغبة و حسب كمية البطاطة المشرملة)




و نضيف ليها ثوم مفروم و الربيع مشلض و الملح و الكامون




و نشحر الكل على نار مهيلة





ثم نضيف البطاطة و السبانخ (ممكن تقطعوالسبانخ او تخليوها ورقة كاملة حسب الرغبة)




و نخليوها تتشحر و تتشرب الشرمولة بضع دقائق




حتى كتذبل اوراق السبانخ و كيتغير لونها للاخضر الداكن









التقديم :





و نقدموها بالصحة و الراحة

كتجي شهوة منها و سريعة و ساهلة فالتحضير و ممكن ترفق اي طبق اضافه الى ان السبانخ فوائدها غنية عن التعريف









اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته




Related Posts Plugin for WordPress, Blogger...
 
Paperblog