السلام عليكم ورحمة الله وبركاتة
هاذ السلطة ســــهلة و لذيذة و كتشبــــع
ممكن تقديمها كطبق مقبلات مرافق لطبق رئيسي
او الاكتفاء بيها كطبق رئيسي لعشا خفيف
كنعملها لما كيجيوني صياف على غفلة و مكتكونش عندي خضرة منوعة او الوقت لتحضير السلطة
او كعشا خفيف ضريف مع شي بسيط ( كفتة او طون او فيلي ...)
المقادير:
معجنات
خيزو
بطاطة
ربيع
ابزار
ملح
خل
زبدة
فص ثوم
نكهة بيستاش
زيت
اوراق خص
ملعقة كبيرة زبدة
الطريقة:
غسلت الجزار و البطاطا و نقيتهم و قطعتهم مكعبات طويلة
و سلقت خيزو فماء مملح
و البطاطة كذلك
بالنسبة للمعجنات ( اختاريت نوع fusilli)
قسمتها قسمين
قسم سلقتو فالماء عادي مع الملح
و قسم سلقتو فماء الباربا مع الملح
للي حتافظت بيه بعد سلق الباربا،
بعد النضج ،
خلطت القسم الاول من المعجنات مع ملقعة كبيرة من نكهة البيستاش
و رشة ملح و ابزار و خل
و ضفت ليه القسم الثاني
للي تسلق فماء الباربا و اكتسب اللون الغوز
و خلطت الكل مع ملعقة صغيرة من الزيت ( زيت ارڭان)
و حظرت الشرمولة :
فص ثوم كبير محكوك
+ ربيع مقطع
+ رشة ملح
+ رشة ابزار
+ ملعقة كبيرة زبدة
ديتهم و جبتهم فوق عافية مهيلة
و قسمت الشرمولة جزئين
جزء عملتو للجزر
و جزء عملتو للبطاطة
التقديم :
قدمت الكل فطبق مفرش بالخص كيف مبين فالصورة
للاسف مزينتهاش و خليت التقديم بسيط حيت مكانش عندي الوقت لتفنن هههه
ملاحظة :
باش تنجح معكم للمعجنات ( les pates ليپات)
مترميوها حتى يكون الماء مغلي مزيان كيفور
و كمية كافية لسلقها
باش متضطروش تزيدو ماء بارد لو كان الماء قليل،
و دائما احترمو وقت السلق ،
غالبا مكتكون مدة السلق بين 5 و 7 دقائق
حسب درجة حرارة كل شعلة
( كويزينير عن كويزينير او توندور يختلف،
كلا كيريڭليهم على هواه و حاجتو)،
و بعد متسلقوها و تعملوها تقطر
كبو عليها ماء بارد باش توقفو عملية الطياب
لانها كتزيد تطيب ملي كتبقى سخونة و ممكن تتعجن،
و لما تتسقطر من الماء
دهنوها اما بالزبدة او الزيت
باش تعطيوها لمعان و متتعجنش او تكرم .
اللهم ادمها نعمة و بارك لنا فيها و اكتب لي بها حسنة ترضاها و اجعل فيها الصحة و العافية
الله يرزقنا و إياكم خيرات الدارين و لا يحرمنا من طيبات الجنة و نعيمها
ان شاء الله تروقكم
دمتن في رعاية الكريم
اختكن أمنــار
أم ريـَّــان
Articles
