Rechercher dans ce blog

Chargement...

lundi 9 mars 2009

طاجين الدجاج معسل و مخضر بطريقتي





السلام عليكم ورحمة الله وبركاتة
















حبيباتي هاد الطاجن للي ذاقو عندي كيسولني على الطريقة
و فعلا كيجي لذيذ و للي ذاقو كيظن انه صعب التحضير
لكن هو سهل و كيوجد فيسع لو جاوك ضياف على غفلة







انا كل مرة باش كنحضرو دجاج، كوكلي، سمان، حمام او حتى لحم او حوت
و كل مرة باش كنخضرو:
تفاح ، بعويد، اناناس، مشماش ، خوخ ، شهدية...
طري او معلب فواكه جافة حسب المتوفر

لكن طريقة الطبخ و التحضير كتبقى وحدة
ان شاء الله تعجبك و تفيدكم










نخليكم مع المقادير:




دجاجة (الحجم حسب عدد الاشخاص)
2 بصلات بيضين مشلضين
2 فصوص ثوم مهروس او مدقوق
1ملعقة صغيرة كامون
1ملعقة صغيرة عطرية الدجاج
نصف ملعقة صغيرة خرقوم
1 مكعب البنة زعفران
نصف ملعقة صغيرة سمن بلدي
15 حبة قاعقلا صاينة
5 حبان بسيبيسة صاينة
ملعقة وريقات نويويرة صاينين
ملح




ملعقة سكر فانيلا
2 معالق زبدة
ملعقة قرفة




للتخضير:



انا خضرة بالبعويد طري و المشماش يابس و الڭرڭاع و اللوز مهرمش


























الطريقة:

اولا كنغسلو الدجاجة ديالنا بالماء و الملح و الخل او الحامض و نفركوها مزيان بالملحة الغليضة باش يتحد منهاكل الشوائب و ايضا كينقصو الدهون





ثم كنشدها نقطعها لاطراف ، انا كنبغي نقطعها كل طرف بوحدو باين يعني الى 9 اطراف


السفة بالحليب الڤانيلا مكسرات الفواكه

طريقتي في تنظيف و تقطيع الدجاج بالصور





و كنوجد الشرمولة التالية:





فإناء كندير الملح و 2 فصوص ثوم مهروس او مدقوق مع ملعقة صغيرة كامون و ملعقة صغيرة عطرية الدجاج
و نصف ملعقة صغيرة خرقوم و 1 مكعب البنة زعفران
و نصف ملعقة صغيرة سمن بلدي 15 حبة قاعقلا صاينة
مع 5 حبات بسيبيسة صاينة مع ملعقة وريقات نويويرة صاينين






كنضيف للكل قياس نصف كاس صغير ماء و كندق الكل باش تتجانس النكهات و تذوب فبعضها،






بعدها كندير فيها قطع الدجاج و نفركها بهاد الشرمولة مزيان هي و البصلة
( لو مكنتش مزروبة راه كنخليها تتخمر و تشرب النكهات مزيان باش كتزيد تبنان اللحم ديال الدجاج و لو كنت مزروبة فكنديرها الطيب نيشان)




بعد ميتشرب الدجاج الشرمولة كنستفو و نديرو يتشحر فالكوكوط مع البصلة




و بعدها كنضيف عليه قياس الماء فاش يطيب و نسد عليه حتى ينضج





بعد مكيطيب الدجاج كنعزل الدجاج عن المرقة






و كنخليه ينشف من المرقة




و كنوجد الخليط باش غنحمرو
و هو : نصف ملعقة سكر فانيلا
مع نصف ملعقة قرفة
مع 2 معالق زبدة



كنخلطهم مزيان




و كندهن بيهم كل قطع الدجاج من كل الجهات




و كندخلهم للفرن يتحمرو







و كنبدا فتحضير التخضيرة

هاد المرة خضرة بالبعويد طري و المشماش يابس و الڭرڭاع و اللوز محمر و مهرمش،
مملن تخضرو بالانناس طري او معلب او يابس او بالتفاح او البنان او الخوخ معلب او اي شي عندكم
انا مكانش عندي المعلب فقضيت بالطازج احسن

خذيت البعويد غسلتو و نقيتو مزيان



و قطعتو ترونشات و حيدت ليه الزريعة




و درتو فكسرونة





مع بودرة عصير الاناناس




و مع فنجان صغير ماء





و عملتو فوق عافية مهيلة




باش يتعسل و يتشرب نكهة الاناناس

و زينت المشماش اليابس بعد مغسلتو و نشفتو بالڭرڭاع





اما المرق للي بقى واقف و عاقد ديال الدجاج



فضفت ليه مقدار كاس صغير من اللوز المحمر و المهرمش
و نصف ملعقة سكر فانيلا و نصف ملعقة قرفة



و ملي تحمر لينا الدجاج
خذيتالطاجين فاش غنقدم درتو يسخن
و درت فيه المرق اولا
ثم ستفت فيه قطع الدجاج



و على كل قطعة حطيت دوارة من بعويد المعسل
و عليها قطعة من المشماش المزين بالڭرڭاع




و عاود رشيت على الكل لوز محمر و مهرمش

























التقديم :




قدمتو بعد السلطة


























مع خبيزات القمح و الشعير ديال الدار



مرفق بعصير البنان و التفاح بالحليب و اللوز





و فالاخير طبق ديسير مشكل


























ملاحظة:


كلما تخمر الدجاج فالشرمولة كلما كان الذ
هذا ينطبق على كل اللحوم (دجاج ،لحم، سمك...)
فمن الافضل تحضرو اللحم قبل بليلة فالشرمولة
و تخليوها تتشرب التوابل فالثلاجة مع البصل
عاد تنصبوها او طيبوها فاليوم الموالي


غتلاحظو انني نصبتو بلا زيت
لان الدجاج مكيحتاجش الزيت بزاف حيت جلدتو كلها دهنيات ،
و ايضا حيت فالشرمولة درت السمن
و زدت الزبدة فا
لتحمير و هو كافي،
للإشارة الزبدة كذوب و كتبقى فطاوة التحمير يعني الدجاج كيجي ناشف ماشي عامر بليدام

اما بالنسبة للمذاق الحلو فممكن تستغناو عليه لو كنتو غتقدموه لاشخاص عاملين رجيم او مرضي سكري

يعني بدل مديروه معسل و محمر ديروه غير محمر
و ايضا درجة الحلاوة انتم تختاروها انا كنعملو حلو غير شوية
لو بغيتوه يجي حلو و معسل اكثر زيدو السكر او السكر الفاني



ان شاء الله يعجبكم هاد الطبق
وصدقوني للي ذاقوعندكم غيبغي يعرف الطريقة


و كنديرها حتى للحم و الحوت بنفس الطرقية غير كيتغيرو شوية العطرية
اضافة الى العطرية المعتادة (ملح ابزار خرقوم سكنجبير كامون قاعقلة بسيبيسة نويويرة )
للدجاج كنضيف عطرية الدجاج "مروزية"
و للحم كنضيف شوية المساخن
و للحوت كنضيف شوية من التوابل الاربعة

راه هادي من وصفاتي السرية هههههه
لكن حتى شي منخبيه عليكم الحبيبات






و نتمنى متبخلو عليا بدعواتكم الطيبة
لاني فأمس الحاجة ليها






اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته


9 commentaires:

  1. tbarkllah 3lik llah y3tik shihtatak ya bri olhna

    RépondreSupprimer
  2. allah ibarak fik wisalmak a hebiba
    o la ya7ramni men taltak o da3awatak tayiba
    ya rab amine

    RépondreSupprimer
  3. السلام عليكم و رحمة الله

    ماشاء الله عليك كل وصفاتك مميزة قلبا و قالبا و يشرفني ان اكون عضوة متتبعة بشغف لمدونتك المميزة

    RépondreSupprimer
  4. وعليكم السلام

    بارك الله فيه اختى
    lbanate

    كلماتك فرحتني الله يفرح قلبك
    تميزي بكم و تشجيعكم لي هو حافزي

    RépondreSupprimer
  5. tbarak allah 3lik a hbiba rabi y7fdak w ynjik ammmmmmmm ammmmmmmmmmmmm ammmmmmmmmmmm kaysh'hi b7al deamn

    RépondreSupprimer
  6. allah ibarak fik wissalamak a zine diali
    wiha9a9 lik kol matemaniti

    RépondreSupprimer
  7. لسلام عليكم تبارك الله ما شاء الله على لفنون و الله يحفظ لك ما عز عليك

    RépondreSupprimer
  8. و عليكم السلام ورحمة الله وبركاته


    بارك الله فيك الله يفرح قلبك

    و يجزاك عني خيرات الدارين

    RépondreSupprimer
  9. ما شاء الله
    هادشي عندك بنييييييييييين
    الله يجازيك بخير ويجعل ما تقديمه في ميزان حسناتك
    بغيت فقط نسولك واش ملي درتي المرقة اللي طيبتي في كوكوط في الطاجين عاود شعلتي العافية عليها؟؟

    RépondreSupprimer

Related Posts Plugin for WordPress, Blogger...
 
Paperblog