Rechercher dans ce blog

mercredi 2 septembre 2009

سلطةا لروز بالنكهات سهلة اقتصادية وكتنفع فالعراضات


السلام عليكم ورحمة الله وبركاته



وصفتي لليوم سلطة بسيطة مفيهاش خضار كثيرة
و سهلة لكن مذاقها رآآآئع و مختلف بعض الشي عن المعتاد






هي سلطة اساسها الروز
و المميز فيها انو روز مُـــنـَــكـَّــهْ
سهلة و فالمنتوال و كنتفع فالعراضات
لانها طعم جديد و طبها ممكن تتفنني فتقديمها
باشكال متعدة

انا غنقدمها ليكم بشكل البسيط
كنقدمها فالغذاء او العشاء كمقبلات مرفقة باي طبق رئيسي
خصوصا لو كنت غنقدمو بدون خبز او كنت عارفة انه مغيتكالش بالخبز كالشواء او دجاج ناشف بدون مرق او سمك ...



المقادير :


بلا منطول عليكم الحبيبات نخليكم مع المقادير :

روز حبة طويلة اصفر او ابيض للي كتفضلو
منسم (سيرو او غبرة ) بنكهة الفانيلا اواللوز او اي نكهة كتفضلوها
منسم (سيرو او روح) بنكهة و لون البيستاش

ملح
ابزار
خل

زيت ارڭان (ملعقة كبيرة تكفي المهم النسمة)

جلبانة بصلوقة
بيض مصلوق جزء منو محكوك رقيق و جزء مقسم الى 4

بطاطس مصلوقة و مقطعة حسب الرغبة
زيتون بدون عظم مقطع ترونشات
خيار مقطع دوائر رفيعة
خص
ترونشات مطيشة و خيار مخلل للتزيين

الكميات كتبقى حسب الاشخاص




الطريقة :




طبعا كنغسلو البطاطة و البيض و نسلقوهم
و نسلقو الجلبانة حتا هي
نغسلو الخيار و مطيشة و الخص و نشفوهم
و نقطعو الخيار لرقائق رفيعة
و كذلك نقطعو المطيشة للي غنزينو بيها هي والكونكوبر او الخيار المخلل
الى ترونشات رقيقة بهدف التزيين فقط (اي ممكن نستغناو عليها)

و نعملو الروز يتسلق مع القليل من الملح

بعد متتسلق الخضار والروز و تتقطر

كناخذو الروز كنقسموه لاجزاء حسبالرغبة 2 او 3 او 4 او اكثر
حسب طريقة التقديم للي بغيتو
انا قسمتو لاربع اجزاء
نكهت 2 اجزاء بنكهة البيستاش الفستق
مع قليل من الخل و الابزار
كيخص تكون فيه نكهة البيستاش واضحة
مع نقطة من زيت ارڭان

و 2 اجزاء الباقية نكهتها بروح اللوز ( مرات كنكها بالفاني)
مع قليل من الخل و نقطة من زيت ارڭان و رشة ابزار

(ممكن تضيفو للروز فواكه جافة مهرمشة "لوز"، "كاوكاو"، "كوك"، "بيستاس"... لو كانت متوفرة)

بعدها عملت كل جزء في اناء صغير دائري مغسول بلا مينشف باش ميلصقش الروز او يتهرس شكلو
كيف مبين فالصورة 4 دوائر متقابلة
بعدها ستفت ورقات الخص
و ستت عليها دوائر الخيار

و خذيت البطاطة قطعتها لمربعات صغيرة و حكيت عليها صفار البيض و ضفت عليهم الجلبانة مع الخل الملح الابزار و شوية زيت ارڭان

و قسمتها كذلك الى 4 اجزاء على مدار الطبسيل

بعدها خديت بياض البيض المسلوق للي بقا حكيتو و ضفتو للزيتون ترونشات
و قسمتو ايضا الى 4 اجزاء على مدار الطبسيل

و زيت بالبيض مقطع على 4
و بترونشات الطماطم و الكونكوبر المخلل









التقديم





كندقم الطبق اما بارد او بدرجة حرارة المطبخ
لانه مفيهش المايونيز للي ممكن يخسر المذاق




و ممكن تقديمو فالصيف او فالبرد على السواء


و بالصحة والراحة


ملاحظة:


هاذ الطبق بسيييييط و اقتصآآادي جدا كسلطة
الروز كيكون متوفر ديما و بطريقة التنسيم بالنكهات
كيكون مذاقو متنوع و شي جديد
كذلك البطاطة و البيض كيكونو متوفرين فمدار العام
و غير شوية يكفي يعني حتى لو معندكش باش تعملي سلطة مشكلة
هذا طبق ينفع يتقدم للضيوف و تقضي بللي عندك فالثلاجة
بالنسبة للجلبانة انا كتكون عندي ديما فالكونجيلاتور
كناخدها لما كتكون كثيرة و رخيصة بكميات كبيرة
و كنقيها و نستفها فالكونجيلاتور و كنلقاها وقت مكيكونش عندي باش نخضر
و ممكن تستعملو المعلبة
او تعوضوها باي خضرة متوفرة عندكم



اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتن في رعاية الكريم





اختكن أمنــار





أم ريـَّــان


وعليكم السلام ورحمة الله وبركاته


3 commentaires:

  1. تبارك الله ما شاء الله فنة

    RépondreSupprimer
  2. الله يبارك فيك و يسلمك احبيبة انتي للي فنة

    RépondreSupprimer
  3. ما شاء الله الفنون الله يعطيك الصحة

    RépondreSupprimer

Related Posts Plugin for WordPress, Blogger...
 
Paperblog