سلطة مشكلة بسيطة و مغذية

السلام عليكم و رحمة الله

تفضلو حبيباتي هاد الطبيسيل المتواضع

المقادير :

خيزو
بطاطة
مطيشة
لوبية خضراء
خيار
مكور
ربيع
بصلة مشلضة
ملح
ابزار
كامون
خل
ميونيز

الطريقة :

نغسلو خيزو و نقيوه و نقطعوه مكعبات و نسلقوه
نغسلو البطاطة و نقيوها و نقطعوها مكعبات و نسلقوها
نغسلو مطيشة و نقطعوها مكعبات
نغسلو لوبية خضراء و نقيوها و نقطعوها مكعبات و نسلقوها
نغسلو خيار و نقيوه و نقطعوه ترونشات رفيعة
نغسلو مكور و نقيوه و نقطعوه رقاقات رقيقة

و كنبداو فتحضير الصوصات

بالنسبة لخيزو بعد مكيطيب و كيبرد كنخلطو مع الربيع و ضرس ثوم محكوك و رشة ملح و رشة خل و الابزار و ملعقة كبيرة ميونيز

ونفس الشي بالنسبة للمكور كنخلطو برشة ملح و رشة خل و الابزار و ملعقة كبيرة ميونيز

ونفس الشي بالنسبة للبطاطة كنزيد عليها شوية بصل مشلظ و مع الربيع و رشة ملح و رشة خل و الابزار و ملعقة كامون و ملعقة كبيرة ميونيز

ونفس الشي بالنسبة للوبية خضراء كنزيد عليها شوية بصل مشلظ و ضرس ثوم محكوك مع الربيع و رشة ملح و رشة خل و الابزار و ملعقة كامون و ملعقة كبيرة ميونيز

و بالنسبة للمطيشة كنخلطها مع شوية بصل مشلظ و رشة ملح و رشة خل و الابزار

و بالنسبة للخيار كنتبلو برشة ملح و خل

و نبدا نستف الكل فطبق التقديم
كنبدا من الخارج للداخل

كندير كمية من البطاطة تبعها نفس الكمية من اللوبية ثم خيزو ثم البطاطة ثم المكور و البطاطة و اللوبية و خيزو و البطاطة ... وهكا حتى كنكمل الدورة ديال الطبسيل
بعدها كندير فالوسط دوائر الخيار بالتتابع على شكل زهرة و نعمل فالمركز ديال الطبسيل مطيشة

طبعا كلا تزين كيف بغات

التقديم :

و كنقدمها بالحين بالصحة و الراحة

اللهم ادمها نعمة و بارك لنا فيها
و اكتب لي بها حسنة ترضاها
و اجعل فيها الصحة و العافية

الله يرزقنا و إياكم خيرات الدارين
و لا يحرمنا من طيبات الجنة و نعيمها
دمتن في رعاية الكريم

اختكن أمنــار
أم ريـَّــان

وعليكم السلام ورحمة الله وبركاته