السلام عليكم ورحمة الله وبركاته
حبيباتي ان شاء الله
تكونو كلكم بخير و على خير
اليوم غنقدم ليكم سلطة اقتصادية و سهلة و فنفس الوقت لذيذة و صحية
بطعم مميز للي عزيز عليهم الحمص
و هي سلطة الحمص بالحامض و سكنجبير
نخليكم مع المقادير و الطريقة
المقادير:
حمص مرطب و مسلوق او مفور
حامض
معدنوس
سكنجبير طري
ثوم
ملح
كامون
زيت زيتون
الطريقة:
طبعا كلكم كتعرفو ترقدو الحمص انا كنحفظو فقريعة مرقد فالثلاجة و كنغير الماء كل اسبوع
باش يبقى ديما عندي الحمص مرقد جاهز للإستعمال
فهاد الوصفة ممكن تسلقو الحمص او تبخروه فالكسكاس حسب ذوقكم
انا كنفضلو مبخر كيكون طعمو افضل
ويلى معنديش الوقت كنسلقو فالكوكوط باش يجهز دغيا
بعد ميطيب و يتنشف ممكن تستعمليه بقشورو او تقشروه
شخصيا كنخليه بالقشر لانه مفيد و كيعجبني
كنجهزو خلطة الثوم و السكنجبير الطري
كنقيو الثوم و نقطعوه و كذلك عرق السكنجبير الطازج كناخذو منو قياس ملعقة صغيرة
و كنطحنوهم او ندقوهم او نحكوهم
و نشلضو المعدنوس
ثم كنخلطو الكل مع بعض
الحمص مع خلطة سكنجبير و الثوم و رشة كامون و ملح و قياس 2 معالق عصير حامض
و المعدنوس مشلض و ملعقة زيت زيتون
و هاهي السلطه جازة
كنزينوها بالمعدنوس و ترونش حامض و للي كيبغي زيت الزيتون يزيد خويط منها فوق السلطة
التقديم :
نقدموها بالصحة و الراحة
و لا داعي نقول انها سلطة كتشبع مزيان و مذاقها مميز
و بالصحة و الراحة
ان شاء الله تعجبكم الوصفة و تجربوها
و تكون اضافة مفيدة
و طريقة جديدة لتقديم الحمص
و بإذن الله نحط ليكم طرق اخرى
لتقديم اطباق بالحمص تنوعو بيها وصفاتكم
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
Articles
سلطة فنة و سهلة
RépondreSupprimerانتي للي فنه احبيبة
RépondreSupprimerالله يسهل عليك كل صعب