بسطيلتي بفواكه البحر والفواكه الجافة

السلام عليكم ورحمة الله وبركاته

اليوم غنشاركم بواحد من اطباقي المفضلة للضيافة
لانه سهل التحضير و لذيذ و يليق للغذاء كيف يليق العشاء

و هو بسطيلتي بفواكه البحر والفواكه الجافة (المكسرات)

هاد الطبق كينفعني بزآآآاف فالضيافة
خصوصا لو جاوني ضياف على غفلة و مكنتش عوالة عليهم
فهاد الطبق كيهنيني و كيحمر لي لوجه

لانه عندي الحوت واجد دائما في الكونجيلاتور (للحزة)
و ايضا الفواكه الجافة مكتخطانيش

هذا الى مكانش عندي هاد البسطيلة واجدة من قبل نصف طيبة

هي بسطيلة ديال الحوت عادية
لكن كنزيد ليها بعض المقادير للي كتزيد تبننها و تعطيها نكهة خاصة
و ايضا كتكون شيء جديد للضياف

نتمنى تكون اضافة جديدة ليكم و ينفعكم في الضيافة

نخليكم مع المقادير:

حوت ابيض
كلمار
كروفيت
حامض مصير
ربيع
زيتيون طرونشات
كونكومبر (خيار مخلل)
بصلة مشحرة
ضرس ثوم
فطر (طازج او معلب او فطر اسود للي متوفر)
فرماج موزريلا محكوك
ملح
رشة ابزار
ورقة الغار
راس ملعقة صغيرة التوابل الاربعة
رشة خرقوم
راس ملعقة صغيرة هريسة
ملعقة كبيرة صوص صوجا
علبة صغيرة شعرية صينية
كاجو، ڭرڭاع ، لوز ، كوكاو منقي و محمر و مهروش طراف كبار
ورقة البسطيلة (منزلية او جاهزة)

للتزيين استعملو للي حبيتو (كروفيت، حامض، جبن ، زيتون...)

الطريقة:

اولا وجدت ورقة البسطيلة ،

غنحط الطريقة ان شاء الله فقسم المعجنات
لما مكيكونش عندي الوقت نوجدها كنشريها جاهزة !

الحوت كيكون عندي منقي و مغسول فالكوجيلاتور
و ايضا فواكه البحر (كروفيت و كلمار)

كنعمل الحوت يتبخر

و كنمشي نوجد الصوص،

كنقسم الكروفيت و الكلمار و الحوت على 2 اجزاء ،
جزء كنخلطو مع الصوص
و جزء كنخليه للاخير
لما كتنضج الصوص و كنبغي نعمر الورقة عاد كنزيدو
( باش يبقاو طراف الحشوة باينين )

كنشحر بصيلة (بيضاء متعملوش الحمرا كتمرر) ،
مع فص كبير ثوم، و ورقة الغار،و الملح و رشة ابزار
و راس ملعقة صغيرة التوابل الاربعة و رشة خرقوم،

و كنوجد ايضا الشعرية الصينية
كنطلقها فالماء سخون و نقطعها و نخليها تتقطر

بعد مطيب البصلة و تتشرب العطرية،
كنضيف ليها الربيع و دوائر الكلمار ،
و نستمر فالتحريك ببطء ،
بعد مينضج الكلمار، كنزيد الزيتون طرونشات
و الكورنيشو مقطع مربعات صغيرة
و المصير مقطع مربعات صغيرة
و الكروفيت و نحرك فوق نار مهيلة

بعد ميتشرب الكروفيت الصوص
و تعقاد الصوص
كنضيف راس ملعقة صغيرة هريسة
و ملعقة كبيرة صوص صوجا
و كنزيد الفطر و الشعرية الصينية

و بعدها لما كيبرد الخليط

كنزيد الجزء المتبقي للي خليت على جنب
الناشف من الكلمار و الكروفيت و الحوت المبخرين
و الفرماج المودزريلا محكوك
و ايضا الكاجو و اللوز و الكاوكاو المحمرين مهرمشين او صحاح

و كنبدا فتعمار و تلماط البسطيلة

ملاحظة :

كنفضل نلمط البسطيلة فوق البوتاجي
بدل منلمطها بالطريقة الاعتيادية فالطاوة ،
باش منستعملش كمية كبيرة ديال الوقرة
و تجي مدكسة و معجنة و تغلب الورقة على الحشوة!

لما كنلمطها مزيان كندهنها بالزبدة و ندخلها للفرن

( لو بغيتي تعملي ليها نصف طيبة ممكن
انا هكدا كنعمل و كنديرها فالكوجيلاتور
باش نعول عليها لو جاوني الناس بدون سابق انذار ،
كنجبدها و نخليها ديكونجلا و نكمل ليها التحمير)

لما كتتحمر، كنكون وجدت طبق التقديم ،
و لما كتكون دفات شوية
كننقلها لطبق التقديم
و نبدا التزيين هنا زينت بللي متوفر عندي

هنا زينتها بحبات الكاجو و الڭرڭاع و الزيتون
و فرشت ليها الخص و الفڭوس
و زينت الجنبات بجبن الساندويتش و الحامض

قدمتها مع العصير مرفقة بالزيتون مشرمل مشكل

و قبل قدمت طبق سلطة معجنات
و جزر مشرمل و بطاطا مشرملة
ان شاء الله نحطو فقسم السلطات!

و دائما لما تكونو غتقدمو بسطيلة
او اي طبق فيه حوت
قدموه دافي او شبه بارد ،
الان الحوت كيكون الذ لما كيكون بدرجة الحرارة المحيطة

هي فكرة جديدة لتقديم بسطيلة الحوت
مع اضافة المودزريلا و المكسرات او الفواكه الجافة ...
كتعطي مذاق جديد و مفاجئ للمتذوق
و كتكون مقرمشة من الداخل كيف من برا ,
نتمنى تعجبكم و تجربوها باي مكسرات متوفرة عندكم .

و بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته