سپاڭيتي بدانون و الورقيات الخضراء

السلام عليكم ورحمة الله وبركاته

اليوم غنقدم ليكم سباڭيتي
ساهلة ماهلة و كاملة مكمولة فيها الغذاء الكافي لكل طبق




هاد السباكيتي كتجي فنة خفيفة ضريفة و سريعة التحضير
و بالنسبة لي هي طبق رئيسي كافي و وافي كيشبع و كيغذي




ان شاء الله تكون اضافة جديدة و مفيدة ليكم الحبيبات


نخليكم مع المقادير و الطريقة

المقادير:


المقادير حسب عدد الاشخاص عينك ميزانك

سپاڭيتي القمح الكامل افضل
يوغورت مسوس (بدون سكر) /او الكريم فريش المعلبة
انا كنستعمل ديال جودة كيجي احسن
لان قوامو فيه الفرماج او الجبن الابيض اكثر
ملح
جلبانة مسلوقة
ملعقة كبيرة سكنجبير طري محكوك






قزبر و معدنوس مشلضين
بصلة خضارية او فقط اوراقها لو كانت طرية او پورو
مكور ابيض او اخضر مشلض



ملعقة زبدة
بيضة (لكل طبق)
شريحة كفتة (لكل طبق / انا استعملت الكفتة ديال بيبي الملفيفة بالفرماج كانت جاهزة عندي)





طوماط سوريز للتزيين

الطريقة :

اولا كنغسلو الخضر ديالنا و نقيوها
و كنديرو الماء يغلى ، و كنعملو فيه الجلبانة الطيب ،




غير يغلى الماء كنصفيو منو الجلبانة و نحطوها على جنب



و كنعملو فيه السپاڭيتي تتسلق مع الملح





كنخليوها طيب بلا متتعجن يعني بين 3 الى 5 دقائق لا اكثر





نصفيوها و نخليو الماء فاش غلات



نضيفو عليه كاس كبير ماء و نخليوه يغلا على جنب




و نعملو للسپاڭيتي ملعقة زبدة
ثم نضيفو عليها الجلبانة و دانون مسوس



و ملعقة كبيرة سكنجبير طري محكوك
و الربيع و المكور و البصل الاخضر
و نخلطو كل هاد المقادير
و نذوقو الى خصها الملح نضيفوه حسب الذوق

نديرو شرائح الكفتة تتحمر انا عملتها فالفرن لان فيها الفرماج
(كتباع جاهزة او ممكن تعملوها انتم)
و فالماء المغلي كنهرس البيض بخفة
غير يطيب البياض كنهز البيضة من الماء بحرص



و كنحط الكل فطبق التقديم و نزين بالطوماط سوريز

التقديم:






قدميها دافية او باردة





كتجي لذيذة و خفيفة






و اكيد مغذية لان فيها اللحم والبيض و الخضار و النشا و الكالسيوم

اتمنى تجربوها و تنال اعجابكم و تكون طريقة جديدة لتقديم السپاڭيتي



اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد






اللهم ادمها نعمة و بارك لنا فيها و اكتب لي بها حسنة طيبة و احفظها من الزوال






الله يرزقنا و إياكم خيرات الدارين و لا يحرمنا من طيبات الجنة و نعيمها





دمتن في رعاية الكريم





اختكن أمنــار





أم ريـَّــان


وعليكم السلام ورحمة الله وبركاته

مافنكيك وريدات بالشكلاط الاسود

السلام عليكم ورحمة الله وبركاته






حلى اليوم:



مافنكيك وريدات بالشكلاط الاسود





ان شاء الله ينال اعجابكن

نخليكم مع المقادير و الطريقة

المقادير :















3بيضات من الحجم الكبير لو كان البيض صغير تستعمل 4 بيضات
75 غرام بودرة الشكلاطة ( شخصيا استعمل بودرة شكلاطة الديسير ايديال نتيجتها رائعة)
50 غرام سكر سنيدة
(ممكن تضيفو اكثر حسب رغبتكم لكن بما ان بودرة الشكلاطة حلوة فعينكم ميزانكم فالسكر وممكن تستغناو عليه)
150 غرام زبدة لينة جدا بدرجة حرارة المطبخ و يمكن تزويبها و تبريدها
150 غرام حليب
150 غرام شكلاطة سوداء مرة بتركيز 73% كاكاو او اكتر





170 غرام دقيق الفورص الممتاز
ملعقة كبيرة ممسوحة خميرة الحلوى
نصف ملعقة صغيرة بيكاربونات الصودا
ملعقة كبيرة ممسوحة مايزينا


هاد الكمية كتعطي تقريبا 6 مافن من الحجم الكبييير
او 12 من الحجم الصغير او اكثر حسب حجم المولات

الطريقة :



نسخن الفرن على درجة حراة 150 الى 180 C°حسب درجة تسخين كل فرن





اولا كندوب الشكلاطة السوداء في حمام مريم و نخليها تبرد شوية



نعزل ابيض البيض عن الصفار





نطرب بياض البيض مزيان حتى يتكثف و يجمد يعني لو قلبت الاناء مكيطيحش البياض
و نخليه على جنب



ناخذ صفار البيض و بودرة الكاكاو و الحليب و الزبدة المذابة او اللينة جدا و السكر و الشكلاطة السوداء المذابة نطرب كل هاد العناصر مزيان حتى تتجانس و تتشكل فيها فقاعات




ثم كنضيف الدقيق مخلوط مع خميرة الحلوة و المايزينة و البيكاربونات



و كنخلط الكل حتى كيتجانسو المكونات




ثم كنظيف للخليط بياض البيض




شوية بشوية وانا كنخلط برفق من التحت للفوق




بحيث منكسروش البياض




باش يكون الكيك ناجح و مفشفش



ثم نكبو الكيك ديالنا فالمول




ممكن تعملوه فمول كبير او فمولات صغيرة
انا هنا عملتو فمول سيليكون على شكل وريدات جوري




وضعت مول السيليكون فالاطة



فيها الماء طبعا "لانا مولات السيليكون كتبغي طيب فحمام ماء لنتيجة افضل"

و دخلتهم للفرن المسخن مسبقا على درجة 150 C° لمدة بين 25 الى 30 دقيقة






بعد مطابت الوريدات خرجتها و خليتها حتى بردات مزيان




و ديموليتها بكل سهولة هذا الجميل فمول السيليكون مكيلصقش ابدا

التقديم :







و هاهي وريداتي جاهزة للتقدم






او للتجميد لضياف الغفلة
(بيني و بينكم مكتبقاش مخبية بزاف فالكونجيلاتور حيت الشكلاط و خصوصا الاسود نقطة ضعفي ، مكيشاورونيش يدياتي حتى كنلقا البواطة خــــــــوات)






او للڭوتي فالدار او للمدرسة






طبعا ممكن تتفنو فتزيينها بالكريمة او الكلاصاج او الموس او للي حبيتو





انا كنقدمها بدون تزيين لان شكلها كافي
و بالصحة و الراحة

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال


الله يرزقنا و إياكم خيرات الدارين و لا يحرمنا من طيبات الجنة و نعيمها


دمتن في رعاية الكريم



اختكن أمنــار




أم ريـَّــان




وعليكم السلام ورحمة الله وبركاته

سابلي الزبيب معلك ساهل اقتصادي لذيذ

السلام عليكم ورحمة الله وبركاته







حبيباتي هاد السابلي كيجي لذيذ و معلك
وكيعجب الصغار و الكبار
و مقاديرو بساط جدا

المقادير :







كيف العادة عندي عجينة سابلي اساسية
كنعملها دائما لانها ناجحة و اقتصادية
و ممكن ضيفي عليها للي بغيتي من منكهات او اضافات انتي و ذوقك


200 غرام زبدة لينة
150 غرام سكر ڭلاصي
ملعقة فانيلا
كنشري روح الفانيلا (غبرة ماشي السكر فاني) بالعبار احسن و نكهتها اقوى من الساشي
بيضة واحدة (كبيرة)
15 سنتيليتر زيت
500 غرام دقيق الحلويات الممتاز
ملعقة كبيرة خميرة الحلوى
ملعقة صغيرة مايزينا
50 غرام زبيب (كلما كان الزبيب اكثر كلما كان حسن)

الطريقة :


في إناء كنطربو الزبدة مع السكر ڭلاصي





حتى الحصول على خليط كريمي ابيض




ثم كنضيفو الزيت



و كنطربو مرة اخرى

ثم كنضيفو البيضة




و نطربو الكل مزيان حتى يتجانس و يعطينا كريمة موس ثقيلة



ثم كنضيفو الدقيق المنخول بشوية بشوية



مع الفاني و خميرة الحلوة و المايزينا ،




و نعجنو الكل بإضافة الدقيق





بشوية بشوية













حتى الحصول على كرة متجانسة مكتلصقش فاليدين




ثم كنضيفو ليها الزبيب للي قطعناه طريفات صغار




كلما كانت كمية الزبيب اكثر و كلما تقطع صغير كلما كان السابلي معلك اكثر




كنخدمو العجينة مزيان




حتى يدخل فيها الزبيب




و يتجانس معها




كنسخنو الفرن بدرجة حرارة 180°


كنحطو العجينة ديالنا على سطح العمل النظيف



و نطلقوها بالمدلك





ثم كنبداو فتشكيل السابلي ديالنا باي شكل كتفضلو
حسب المراشم للي عندكم




انا عملتو بشكل وريدة




و بشكل مستطيل







وجدت الطاوة فرشتها بورق الزبدة

و ستفت فيها السابلي
حاولو تهزوه بشي ملعقة او سباتيل
باش يحافظ على شكلو و ميكونوش فيه طباع الصبيعات

و دخلتو للفرن المسخن من قبل
على درجة حرارة 180 °
بين 10 او 15 دقيقة حسب السخونية ديال كل فران




خليتها حتى بردات و ستفتها فعلبة حافظة

التقديم :







قدموها بالصحة و الراحة










اما بشكلها العادي او الى بغيتو تزينوها حسب الذوق




كتجي معلكة و كذوب فالفم و لذيذة







خصوصا لوليدات عزيزة عليهم و مزيان ليهم
لانه معروف فوائد الزبيب و تاثيرو على الذكاء و الحفظ و الذاكرة

ملاحظة :



هاد المقادير كتعطيكم اكثر من نصف كيلو ممكن تضاعفوها لو بغيتو كمية اكبر
ممكن تحتافظو بيها مدة طويلة
فعلبة حافظة محكومة الاغلاق

و ايضا ممكن بدل الزبيب تستعملو المشماش يابس
او انناس او فواكه يابسة
محكوكة او مقطعة بنفس الطريقة
و ممكن تزيدو كمية السكر او تنقصوها حسب اذواقكم

يعني العجينة كتبقى واحدة و التنويع فالاذواق
حسب الرغبة و متوفر في كل مطبخ


إن شاء الله تعجبكم الوصفة و تجربوها
و تكون اضافة جديدة و مفيدة ليكم

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته