السلام عليكم ورحمة الله وبركاته
طبقي لليوم ان شاء الله
السفة بالحليب و الڤانيلا و مكسرات او الفواكه الجافة
المقادير:
1 كيلوغرام شعرية سفة
نصف ليتر حليب
ملح
بودرة الڤانيلا
روح الڤانيلا السائلة
ثلث كاس عنبة زيت
3 ملاعق كبيرة زبدة
للتنسيم و التزيين :
قرفة (بودرة)
سكر ڭلاصي حسب الذوق و حب الحلاوة
نجمات باديان Badiane chinoise او ما يسمى ب anis étoilé
200 غرام كوك
200 غرام كاجو
200 غرال لوز مڭلي
200 غرام كاو كاو مڭلي و منقي
200 غرام ڭرڭاع
200 غرام زبيب بلدي مغسول و منشف
الطريقة :
اولا كنديرو الماء يغلي فالڭدرة
و كنوجدو الشعرية سفة للتبخيرة الاولى
فقصرية كنعملو الشعرية سفة
و ندهنوها مزيان ب 2 معالق زيت
و رشة ملح
و نحاولو ندهنو كل الشعيرات باش متتعجن من بعد
بعد مكيوصل الماء فالڭدرة لدرجة الغليان
كنحطو الشعرية السفة المدهونة فكسكاس
و نحطوها على الڭدرة تتبخر بين 20 الى 25 دقيقة
ملي تتبخر التبخيرة الاولى
كنهزو الكسكاس من فوق الڭدرة
و نحطوه فإناء غارق يسمح بالتقطير
و كنشدو الڭدرة و نكبو الماء المغلي للي فيها على السفة
عنداكم ديرو بحالي و تحرقو يديكم
و نخليوها تتقطر مزيان
و كنردو الماء يغلى فالڭدرة
مللي تتقطر كنحيدوها من الكسكاس و نردوها للقصرية
و هي باقي شادة السخونية كنسقيها بنصف كاس حليب
و ندهنها بملعقة كبيرة زبدة
و نفتلها بيدي نحاول نفرق الشعيرات
و نخليها تتشرب الحليب
لما تبرد تماما و تتشرب كنردها للكسكاس
و نردها فوق الڭدرة تتبخر واحد 20 الى 25 دقيقة التبخيرة الثانية
و بنفس الطريقة ملي تتبخر التبخيرة الثانية
كنهزو الكسكاس من فوق الڭدرة
و نحطوه فإناء غارق يسمح بالتقطير
و كنشدو الڭدرة و نكبو الماء المغلي للي فيها على السفة
و نخليوها تتقطر مزيان
و كنردو الماء يغلى فالڭدرة
مللي تتقطر كنحيدوها من الكسكاس و نردوها للقصرية
و هي باقي شادة السخونية كنسقيها بكاس حليب
مضاف اليه قطرات من روح الڤانيلا و الملح
و ندهنها بملعقة كبيرة زبدة
و نخليها تتشرب الحليب
للي كيحب الحلاوة ممكن يضيف السكر ڭلاصي
لكن انا كنفضلو يكون فالتزيين اختياري لانه كيميه السفة
لما تبرد تماما و تتشرب كل الحليب كنردها للكسكاس
و نردها فوق الڭدرة تتبخر واحد 10 الى 15 دقيقة التبخيرة الثالثة
لما تتبخر كنردها للقصرية و نرشها بنصف كاس حليب مذاب فيه الڤانيلا بودرة
و ندهنها بملعقة كبيرة زبدة مخلطة ببودرة الڤانيلا و هي باقي سخونة
ونفتلها مزيان باش تتشرب البنة ديال الحليب و الڤانيلا و الزبدة لتفادي التعجن
و يا سلام على ريحة الڤانيلا كيف كتكون
تبغي تاكليها هكاك دون اي اضافات
و كنجهز طبق او اطباق التقديم
لما كنعمل السفة بها الطريقة يعني بالمكسرات و الحليب فقط دون مرق
فكنقدمها فاطباق فردية
كنفرش السفة اولا فالطبق و نعمل ليها
طبقة من القليل من السكر ڭلاصي
و طبقة من القرفة
و طبقة من الكوك
ثم كنزينها بطبقات من بالفواكه الجافة
الكاوكاو و اللوز
و الڭرڭاع و الكاجو و الزبيب
كيف مبين فالصور
و كنحاول نزينها بالفواكه الجافة
او اي زينة اضافية عندي هنا الختام كان نجمة باديان
التقديم :
هاد الطبق ممكن يقدم كأساس
او كمرفق لطبق اخر ( دجاج او لحم و حتى حوت مطبوخ بشكل التبخير و التحمير و بطعم الحلو باش ينابس حلاوة السفة)
كنقدمها سخونة او دافية او حتى باردة
و كتجي لذيذة جدا
و مشبعة و مغذية لان فيها كلشي حليب و نشا و مكسرات كلها فوائد
و طبعا طريقة جديدة و بسيطة لتقديم السفة
ملاحظة :
استخدم الحليب فالسقي لانو كيعطي للسفة مذاق لذيذ و الڤانيلا كتلعب دور كبير فالبنة
لو غتقدميها مباشرة فهي جاهزة للتقديم لو غتجهزيها مسبقا قبل التقديم
ممكن حفظها فالثلاجة و لما يحين وقت التقديم فوريها مرة رابعة باش تسخن سقيها بالحليب زينيها و قدميها بالصحة و الراحة
ان شاء الله تنال اعجابكم
اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد
اللهم ادمها نعمة و بارك لنا فيها و اكتب لي بها حسنة طيبة و احفظها من الزوال
الله يرزقنا و إياكم خيرات الدارين و لا يحرمنا من طيبات الجنة و نعيمها
دمتن في رعاية الكريم
اختكن أمنــار
أم ريـَّــان
وعليكم السلام ورحمة الله وبركاته
Articles
