سلطة نافورة الخضار

السلام عليكم ورحمة الله وبركاته

حبيباتي
اليوم غنقدم ليكم فكرة جديدة لتقديم السلطة بشكل بسيط لكن مميز

هادالسلطة كنت عملتها فضيافة سابقة

طاجين الدجاج معسل و مخضر بطريقتي و بالمراحل المصورة من كوزينتي

و كيف واعدتكم نزل ليكم الطريقة و المقادير
اليوم كتاب نزلها

مقاديرها بسيطة و ممكن التنويع فيها بالمتوفر عندكم
المهم هو فكرة التقديم على شكل نافورة

باش ننوعو و نفرحو ضيافنا او اهل البيت
كيف كيقول المثل العين كتاكل قبل الكرش

نخليكم مع المقادير و الطريقة

المقادير :

انا كان عندي الاتي

قمح مسلوق (غنزل ليكم الطريقة ان شاء الله)
بطاطة مسلوقة
باربة مسلوقةن
لوبية مسلوقة
خص
مطيشة':
كورنيشون كبير
خيار
زيتون اسود
قلوب الخس

بصلة مقطعة ترونشات رقيقة مرقدة فالخل و السكر
فرماج منسم بالثوم و الاعشاب
فلفلة حلوة

للتنسيم :

خل
ملح
ابزار
ثوم محكوك

ڤينيڭريت و كريمة قدمتهم على جب للتغماس

الطريقه:

اختارو الطبسيل للي يعجبكم المهم يكون شكلو يوحي بالنافورة

انا استخدمت 2 طباسل واحد فوق الثاني

اولا كنحطو القمح المسلوق بعد منسموه بالملح و الخل و رشة سكر و ابزار
وسط الطبسيل

ثم كندورو عليه البطاطة

كيف كتشوفو قطعتها دوائر زيڭزاڭ

و كنديرو دورة ديال اللوبيا

ايضا منسمة بالڤينڭريت (خل ملح ابزار رشة ثوم محكوك)

كنحاول نشكل بيها وردة بين القمح و البطاطة الصور تشرح اكثر

ثم كنضيف بجنب دوائر البطاطة

قطع باربة مقطعة على الطول بشكل زيڭزاك
و ايضا نسمتها بالڤينڭريت (خل ملح ابزار رشة ثوم محكوك)

ثم كنضيف بجنب الباربة دورة اخرى من دوائر البطاطة
و كنوزع فوقها قطع الباربة
و قلوب الخس مغروسة فيها قلوب الفلفة الحلوة

كنزين قلب السلطة اي القمح المسلوق بترونشات بصلة
مقطعة رقيقة مرقدة فالخل و السكر على شكل بتلات
و حبة زيتون اسود

و كملت التزيين بحبات الزيتون و ترونشات البصلة

الصور تشرح اكثر

ثم كناخد الخيار المقطع الى ترونشات رقيقة غير مفصولة
كنزين بيه جنبات الطبسيل
باش يعطي شكل الماء المتدفق

و فوق كل لواية خيار كنحط مكعب او ملعقة صغيرة فرماج منسم بالاعشاب

و نزين باقي جنبات الطبسيل الاول بترونشات الكونكوبر

و بين كل خيارة متدلية كنحط ترونشات المطيشة

و رؤوس الخس الصغيرة
و حبات الزيتون الاسود

كيف مبين فالصور

اظن الصور ابلغ فالوصف

و هاهي نافورتي جاهزة للتقديم
او للحفظ فالثلاجة لحين التقديم

التقديم:

لما قدمتها ارقفتها بالڤينيكريت

و بكريمة الجنب المنسم بالاعشاب و بالمايونيز

و كلا غمس الخضار حسب ذوقو

ان شاء الله نكون وفقت فإيصال الفكرة
ماشي مهم مكونات الطبق الاهم التقديم
يعني لو عندك غير 2 انواع خضار
ممكن تشكلي بيهم طبق مميز
يعجب اهل بيتك او ضيوفك

و لا تنسوني من صالح الدعاء حبيباتي

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته