حرشة معمرة بالشكلاط و اللوز

السلام عليكم ورحمة الله وبركاته

وصفتي لليوم ان شاء الله تابع لسلسلة وصفاتي للحرشة المعمرة
كيف سبق و قلت و كنعيد:
انا من محبــــــــــــــــــــــــــــــــات الحرشة

و كنحاول ننوع فيها و فالحشوات ديالها (مالح حلو . . . )

الحرشة اســــــــــــهل نوع معجنات ممكن نعملوه ناجح 100%
اقتصــــــــــــادية بلا تمارة والا ضياع وقت

مكتحتاج لا دليك لا تخمار
و ممكن ننوعو فيها كيفما تشهينا

و نحشيوها حسب ذوقنا مالح او حلو

و كتوجد بالخف و تليق :

للفطور
الغذا
الكاسكروط
او العشا
...
كاين محسن من هكا ?!

وكيف واعدتكم هادي طريقة اخرى لتعمار الحرشة
او بالاحرى حشوة اخرى للتنويع
و كتجي لـذيــــــــــذة:
حرشة معمرة بالشكلاط و اللوز

نخليكم مع المقادير والطريقة

المقادير:

500 غرام سميدة الحرشة

ملعقة صغيرة ملح،
ملعقة كبيرة سكر

رأس ملعقة خميرة الخبز،
روح الڤانيلا غبرة
قطرات من روح الشكلاطة ...

خميرة حلوى ،
فنجان حليب بودرة
فنجان زيت
1/4 لتر ماء / كاس ديال عنبة
(ممكن إضافة الماء اكثر حسب جودة الدقيق المستعمل)

للحشوه او العمارة

شكلاطة سوداء% 73 او اكثر
او بديل الشكلاطة او شكلاطة بالحليب
او شكلاطة للدهن (نيوتيلا) او اي نوع شكلاط كتفضلو

لوز مقطع رقائق

الطريقة :

في إناء نخلطو المقادير الناشفة بالتتابع

كيف مبين فالصور
500 غرام سميدة الحرشة
+ ملعقة صغيرة ملح
+ ملعقة كبيرة سكر
+ رأس ملعقة خميرة الخبز
+خميرة حلوى بودرة
+ روح الڤانيلا غبرة
+فنجان حليب

نخلطو كلشي النواشف مزايان و نضيفو الزيت

و نفتلوها

كيف تانفتلو الكسكس او البات بريزي حتا تشرب الزيت

ثم نضيفو4/1 لتر ماء ونعجنو السميد

و نضيفو ليه ايضا قطرات من روح الشكلاط

ونخلطو مزيان حتا نحصلو على خليط رخو
و متماسك فنفس الوقت

(ممكن إضافة الماء اكثر حسب جودة الدقيق المستعمل)

و نخليوها ترتاح شوية
و نبداو فتكويرها

و قسمت العجين الى كويرات بقياس المشمشة الكبيرة

و كنحشيها بملعقة صغيرة من رقائق اللوز و قطع الشكلاطة

كنحطهم وسط الكرة المبسطة

و الطريقة مشروحة بالصور

اولا كنبسط الكرة فراحة يدي

و كنحط عليها ملعقة صغيرة من رقائق اللوز

و قطع الشكلاطة

وسط الكرة المبسطة

و كنعاود نسدها و نكورها

كيف مبين فالصور

و بعد منكملو التعمار

نسخنو المقلة (مقلة وجدة الثقيلة افضل)

و كنبداو نمرمدو كويرات الحرشة فالسميدة من كل الجهات

و نڭرصوها كيف مبين فالصورة

و نبداو نطيبو الحريشات ديالنا

على نار مهيلة

حتى يتحمرو و يطيبو على خاطرهم
و يكتاسبو لون ذهبي محمر

التقديم :







نقدموها سخونة اوباردة







كتجي معلكة بالشكلاط



و فنفس الوقت مقرمشة باللوز

بالصحة و الراحة

اتمنى تجربوها و تنال اعجابكم و تكون طريقة جديدة لتقديم الحرشة

ملاحظة :

الحرشة قابلة للتجميد سواء ا كانت عادية او محشية
يعني ممكن تعملوها بكمية كبيرة و تحشيوها بحشوات متنوعة مالحة و حلوة
و تحفظوها فالفريزر او المجمد لحيت تحتاجوها
خصوصا و شهر رمضان الفضيل على الابواب و كنبغيو نوجدو شهيوات خفيفة مسبقا
باش يبقى لينا وقت للعبادات فالشهر الابرك

لما تبغيو تقدموها جبدوها و خليوها ديكونجلا على خاطرها
و سخنوها اما فالفرن مسبق التسخين او فمقلة وجدة الثقيلة
و قدموها بالصحة و الراحة بحالا عاد وجدتوها

اللهم لك الحمد و الشكر كما ينبغي لجلالك على نعمك الكثيرة اللتي لا تحصى و لا تعد

اللهم ادمها نعمة و بارك لنا فيها و اكتب لي بها حسنة طيبة و احفظها من الزوال

الله يرزقنا و إياكم خيرات الدارين و لا يحرمنا من طيبات الجنة و نعيمها

دمتن في رعاية الكريم

اختكن أمنــار

أم ريـَّــان

وعليكم السلام ورحمة الله وبركاته